عندي مبدأ من زمان بتبعه .. اللي هو (تفتيش
في اشي ما بتعرفيه!!)
وهادا حالي الدائم مع السياسة .. بحبش السياسة!
عشان هيك ما بقرب عليها ..ولهيك ما
بعرفها .. ولهالسبب ما بفهم فيها .. وعشان هيك بقدرش أفتي فيها!!
أوك ..في أشياء بتستفزني مرات .. في أشياء بتثير فضولي أحياناً .. وفي
أشياء بتقرفني دايماً!! .. بضطر وقتها اضطرارياً إني أحكي فيها!
من زمان وانا زغيرة كنت بسمع دائماً
بمصطلح متداول }السياسة ,,تياسة , {مع
احترامي للسياسيين _أو مش ضروري الاحترام_ ,, يمكن حدا يستغرب .. يوه؟؟!! كيف ما بتفهمي
بالسياسة
وانتي حياتك كلها سياسة؟؟ ..عايشة بأرض السياسة ..بتصحي ع سياسة .. وبتنامي ع سياسة .. بأكلك سياسة ..بلبسك سياسة ..بكل إشي سياسة ..!! ...آه ..مهو
عشان هيك بحبش السياسة!!
أنا ما بعرف عن السياسة غير إنو اسرائيل هي
العدو المجرم اللي محتل بلدنا وأمريكا بتدعمها ,,
وطني ضايع ما بين حكومتين فتح
وحماس,غزة والضفة الغربية ..الحكام العرب جبناااا وبياعين كلام وهيهم بيغوروا واحد
ورا التاني وعقبا للبواقي ..ونقطة انتهى.
انا ايش فهمني بالسياسة؟ ايش عرفني
معنى الديمقراطية ,الجمهورية ,الإمبريالية, الشركسية ,الحزبية, النازية ,
الإقليمية ,الحربية ,الحدودية , اليسارية اليمينية الملوخية ..ايش دخل الملوخية؟؟
...... ما علينا!
مـــــا
علينا؟! .. هو هادا المعنى المزبوط ..ما علينا
!!
يعني الواحد ايش بدو بحرقة هالدم؟؟
لا والاشي المستفز بتلاقي أي حدا وكل
حدا بيحكي بالسياسة وعامل فيها ريتشارد قلب الأسد..(مين هادا؟؟....ما علينا!)
..حتى الولد الزغير بيفتي بالسياسة ..الجاهل الأمي الحمرجي العربنجي بيحكي بالسياسة ..لا وبتلاقيه بيناقش
وبيصرخ هالمسكين ..لا هو فاهم ايش بيحكي ولا اللي قباله فاهم اشي! ..
محدددددش
فاهم حاجة!!
يا عــــــــــــالم بيكفي تياسة
..وخليكو بأكل عيشكم ..وبلا سياسة بلا بطيخ ..الواحد اللي فيه كافيه!!
هالقصة مش غبـــــاء .. بس تغابي
بعيد عنكم _أو قريب_ ...مــــــــــا علينا!!
هالحكي مجرد
ردة فعل تجاه موقف قابلني اليوم .. وما علينا!
هناك 4 تعليقات:
ولا أحد يفهم ماذا حدث ولماذا حدث ولمصلحو من ؟؟؟
طيب ايه اللي بعد العسكر - لازم من رؤية شاملة لكل اللي جاي - لكي لا نقع في نفس الخطأ عندما فرحنا بتنحي مبارك وهو الذي يكلف المجلس العسكري
وكأنه أمير المسلمين وامير القطر المصري يولي من يشاء ليخلفه في الحكم
لازم نتفق ونتوحد ونجتمع علي كلمة سواء
لكي لا يحدث ما لا يحمد عقباه
كأن يحدث أنقلاب ؟؟؟مثلا
كيف نصل لرؤية شاملة - وأين الخلاص ؟؟؟
بردو مش راح أفتي ..
حسونه فعلاً ما حدا فاهم اشي ولا حدا راح يفهم إشي!!
ولا حتى انا فاهمة!!
بالنسبة لإنو نتفق ونتوحد فهادا الإشي مستحيل ,فقد إتفق العرب _دائماً_ على ألا يتفقوا!!
الخلاص هو انه نبقى نؤمن بقضيتناأياً كان نوعها ومدى صعوبة تحقيق نتائجها,ومهما كان الطريق وعراً هناك نهاية ..والنهاية نحن من يقررها سواء كانت جيدة أم لا ..هناك نهاية لما يحدث! ..ويبقى لنا أن نواصل النظر إليها بعين التفاؤل ..والإيمان بأن القادم أجمل بإذن الله ..
ولا انا بحبها ..
اشي طبيعي يا هالة :)
نورتوا مدونتي
إرسال تعليق