"وحدن بيبقو متل زهر البيلسان وحدهن بيقطفو وراق الزمان
بيسكرو الغابي بيضلهن متل الشتي يدقوا على بوابي على بوابي"
لما غنتها فيروز وسمعتها أول مرة ,حسيت بصوتها حزن كبير , وهادا غير شعور الدفا اللي بحسه دايماً بصوتها
"يا ناطرين التلج ما عاد بدكن ترجعوا صرخ عليهن بالشتي يا ديب بلكي بيسمعوا"
هالكلمات اللي كل ما أسمعها بتأثر فيها بشكل كبير ,خاصة انو إلها قصة نضال انكتبت فيها ..
هالأغنية اللي غنتها فيروز بصوتها الساحر وإحساسها العالي تحت إسم "وحـــــدن" , واللي كتبها الشاعر اللبناني طلال حيدر إلها وقع خاص على روحي لما أسمعها , بس هالأغنية ما غنتها فيروز لأي حدا , غنتها ل3 أشخاص مميزين وهادي قصتهم اللي كتبها الشاعر طلال حيدر من خلال كلمات هالأغنية,,,
كان الشاعر طلال حيدر كل صبح ومسا بيشرب قهوته على بلكون بيته المطل على غابة قريبة منه , وكان كل يوم يشوف ثلاثة شُبّان بيدخلوا للغابة في الصبح وبيطلعوا منها المسا .. وكانوا كل ما يدخلوها ويطلعوا منها يسلموا عالشاعر طلال حيدر ويلقوا عليه التحية , وكان دايماً بيتسائل ايش بيعملوا كل هالوقت جوا الغابة؟؟ ... وفي صباح من الصباحات إجوا ليلقوا التحية كالعادة وفي المسا وقف طلال حيدر ليشرب قهوته لكن الشبان الثلاثة ما طلعوا, وضل ينطرهم بس بردو ما طلعوا ..قلق الشاعر عليهم لأنو مش من عادتهم يتأخروا ...إلى أن وصله خبر بيحكي انو في ثلاثة شبان فلسطينيين قاموا بعملية فدائية وسط اسرائيل ,ولما شاف صور الشبان الثلاثة اللي استشهدوا هم نفس الشبان اللي اتعود يتلقى التحية منهم كل صبح ومسا ... فكتب قصيدته "وحدن بيبقوامتل زهر البيلسان بسكروا الغابي بيضلهم متل الشتي يدقوا على بوابي".
كلمات الأغنية ..
وحدن بيبقو متل زهر البيلسان وحدهن بيقطفو وراق الزمان
بيسكرو الغابي بيضلهن متل الشتي يدقوا على بوابي على بوابي
يا زمان يا عشب داشر فوق هالحيطان ضويت ورد الليل عكتابي
برج الحمام مسور و عالي هج الحمام بقيت لحالي لحالي
يا ناطرين التلج ما عاد بدكن ترجعوا صرخ عليهن بالشتي يا ديب بلكي بيسمعو
وحدن بيبقو متل هالغيم العتيق وحدهن وجوهن و عتم الطريق
عم يقطعوا الغابي و بإيدهن متل الشتي يدقوا البكي و هني على بوابي
يا زمان من عمر فيي العشب عالحيطان من قبل ما صار الشجر عالي
ضوي قناديل و أنطر صحابي مرقوا فلوا بقيت عبابي لحالي
يا رايحين و التلج ما عاد بدكن ترجعو صرخ عليهن بالشتي يا ديب بلكي بيسمعو
بيبقى صوت فيروز الدافي بيحمل السلام والمحبة لكل العالم ..ومن صوتها و قلبي سلامٌ لكم يا شهداء وطني
