الأحد، 6 نوفمبر 2011

أضحانا غيـــــــــــــر!!



اول أيام العيد ..

اليوم هو أول أيام عيد الأضحى المبارك ..

المفروض انو يكون يوم  مميز وإلو طعم غيـــــــــــر .. بس طبعاً ما دام العيد ب "غـــــزة" .. فالأكيد انو حيكون مختلف جداً .. مختلف بإنو عــــــــــــــــادي جداً!!على غير عادة الأعياد بأماكن تانية من العالم!!

صحيت الصبح .. أحلى ما في العيد تكبيرات الإحرام ..
الله أكبر .. الله أكبر .. الله أكبر .. لا إله إلا الله

الله أكبر .. الله أكبر .. الله أكبر .. ولله الحمـــــد

الله أكبر كبيراً والحمدلله كثيراً لا إله إلا لله ....

وأصوات الأطفال بتكبر بالشارع وبتشرح القلب ..كان النسيم بارد و الجو غائم  وبيبشر بمطر كتير .. ومع هيك نزلوا للتهليل والتكبير والفرحة بتملى قلبهم ..

من بعد صلاة العيد والتكبيرات .. صار لازم يروحوا يفطروا ويلبسوا للعيد قبل ما ييجي!!

}في مرة كنت بسمع محادثة شارعية بين طفلتين ما بيتجاوز عمرهم 3 أو 4 سنوات كانت بتحكي لصاحبتها :

_إجى عندكم العيد؟؟ ......... ف ردت التانية وحكتلها :

_ لأ لسة هيو راح ييجي كمان شوية بالسيارة!!! ..... ههههههه أطفال!!

]وللأطفال عالمهم الخاص الذي يجهله كثيرٌ من الناس![

هالجملة إلها مناسبة خاصة جداً ما بتعرفها غير ناس خاصة جداً بردو ^_*

المهم نرجع لوصف أجواء العيد بيومي الأول ..

بصراحة اللي بيحسسني بوجود العيد هو وجود "ميدو وفروحة" !

مبارح "بالأمس" كانوا معلقين ملابسهم الجديدة ومحضرين كل مستلزمات العيد .. زي ما كنا نعمل واحنا زغار ^____^ >>>> قول للزمان إرجع يا زمان!!

واليــــــــــوم لبسوا لبس العيد .. وطبعاً بما إني الأخت الكبيرة .. وبما إنو ما في طقوس معينة أعملها .. فالمفروض إني بهيك حالة أشتغل كل اشـــــي .. كوافير مكوجي مصوراتي .. إلخ إلخ ..

وبعد انتهائي من جميع مهماتي العيدية .. صار وقت لَمْ العيدية!!

طبعاً هادي أحلى فقرة بالعيد :) .. وكعادتي _ أيضاً _ باليوم الأول إني أشتغل ضمن جروب الريسبشن والغراسين!! .. بس كلو بحسابه ^_^

وبهذا الوقت .. فضيت علينا الدار والوحدة زي النار>> إقتباس لهاني شاكر ..

طلعت عالبلكون حتى أشوف أطفال العيد ولبسهم الجديد! .. وانا واقفة بتفرج وريحة "الزفارة" تعج بالمكان >> طبعاً هالكلمة إلها معني خاص وحلو بهاليوم ^_^ ..

ومضى الوقت .. وعدّا اليوم الأول على خيــر والحمدلله ..



مممم يمكن إحساسنا بفرحة العيد وطقوسه بتقل سنة عن سنة! ..

يمكن لأاني بكبر كل سنة ..!! ... ويمكن لأني بنت بتكبر ..!!

زمان العيد كان إله طعم تاني .. كانت كل الناس تفرح ب "قدومه" .. صغار وكبار ..

كان كل إشي بيحكي انو الدنيا عـــــــــــــــيد!! .. كنا نستعد كتير وقبل فترة كبيرة منه ..

كنا نعمل ألف حساب .. وهالوقت هو آخر حساباتنا ..

يمكن لأنو الدنيا تغيرت !!.. يمكن لأنو صرنا نستكتر على حالنا الفرحة ..!!

يمكن لأنو مش لازم نفرح ..!!

يمكن لأنو مضطرين نفرح شوية علشان اطفالنا .. لأنو بيوم من الأيام كنا صغار .. وكان أي إشي بسيط بيرضينا ..!!

يمكن بنفرح بالعيد آه .. لكن الفرحة بتضل ناقصة .. بيضل فيه غصة بالقلب ..

يمكن هادا احساسنا (الإنساني) بإنو بهالوقت مش كل الناس مبسوطة ..

في ناس بالنسبة إلها العيد هو مجرد ذكرى مقيتة .. ما نفسهم تيجي ..

فقد شخص غالي بيوم .. وافتقاده كل يوم ..

فبأي حالٍ جئتَ يا عيـــــد؟!

بنضل نحكي الحمدلله على كل حال .. وان شالله العيد الجاي بيكون أحلى ..

ولكم عيدكم ... ولنا عيــــــــــــد ..
وكل عيد وأنتم بخير وسعــــــــــادة دائمة لا يُنقصها ولا "ينغصها" أي شيء أبداً ..

ليست هناك تعليقات: